Կռվի բախտը-Կռվի բախտը վճռում է թշնամի կողմերից մեկի բարոյական հավասարակշռության խախտումը, որին անմիջապես հետևում է խուճապը, իսկ այդ վերջինին՝ նյութական պարտությունը:
Անհավասար կռվը չէ, որ կործանում է այս կամ այն բանակը, այլ՝ խուճապը, որին մատնված կողմը առնվազն եռապատկում է իր կորուստը, երբեմն էլ՝ոչնչանում գլխովին:
Սպանվածների, վիրավորների, գերվածների, ինչպես և պատերազմական ավարի քանակը եղել է և միշտ շարունակում է մնալ պարտության երկրորդական ազդակը:
Էականը այն բարոյական ազդեցությունն է, որը ունենում է կռվող կողմերից մեկը մյուսի վրա:
Գայլի գործելակերպը-Հին, քարացած ռազմավարության սկզբունքները անտես առնելու ինձ ստիպում էին իմ ռազմական ուժերի քանակը, իմ տեխնիկական թուլությունը և Սյունիքի տեղագրությունը:
Ես նյութական հնարավորությունը չունեի և պիտի չունենաի հավասար ուժերով դիմադրելու թշնամուս:Վաշտը՝ լավագույն դեպքում մոտ 100 հրացանաձիգ. ահա՛ իմ մարտական ուժերի այն միավորը, որը պիտի ճակատեր թշնամու գումարտակի, գնդի, երբեմն՝ է՛լ ավելի մեծ զորամասի դեմ:
Ավելի մեծ « առանձնահատկություն» ինյ թույլ տալ չէի կարող:
Ահա թե ինչու պիտի գործեինք թշնամու որակմամբ՝ որպես «Հին գայլ»՝ հրաժարվելով ռազմավարության հին, շաբլոն ու զանգվածային ձևերից:
***
Սյունիքի հաջողությունների մեջ խոշոր բաժին ունի իմ մշակած ու գործադրած «Գայլի» ռազմավարությունը:Անշուշտ, կռվի ձևերը, ինչպես և ռազմագիտական գերակշռությունը ստեղծող բոլոր տարրերը՝ քանակ, տակտիկական կրթություն, սպառազինություն, անմիջականորեն չեն վճռում կռվի բախտը:Սակայն, նրանք ստեղծում են այն բարոյական գերակշռությունը, որը և պայմանավորում է այս կամ այն կռվող կողմի նյութական հաջողությունը:
Իմ ռազմավարությունը՝ բարոյական գերակշռություն ստեղծել և ապա հարվածել, ինձ հնարավորություն էր տալիս.
Ա.Թշնամուն խուճապի մատնել և ապա ծեծել.
Բ.Թշնամու ուժերը, ամբողջովին կամ մասամբ, առնել տակտիկական աքցանի մեջ և ապա ջարդել.
Գ.Հաճախ նրան շեղել իր գործողության ուղղությունից և օգտվել նրա սխալներից.
Դ.Միշտ էլ հարկավոր կետերի վրա լինել գործուն, աշխույժ.
Ե.Ուժեղ լինել հարկավոր վայրկյանում.
Զ.Գամել թշնամուն իրեն համար տեղագրական անհաջող պայմանների մեջ և պարտադրել կռիվը.
Է.Խուսափել դիրքային ձգձգվող կռիվերից.
Ը.Ամենանվազագույն չափերի հասցնել զոհերի թիվը և ռազմամթերքի ծախսը, և այլն...
Շարունակելի...
Комментариев нет:
Отправить комментарий